Viaxe histórica a través do Castelo de Soutomaior

Arrancan as visitas teatralizadas de Nadal ao Castelo de Soutomaior coas 300 prazas esgotadas e cunha ampla oferta de actividades que poñen en valor o patrimonio

Imaxe do Castelo de Soutomaior // Cedida

Metanoia

Este mércores 6 de decembro comezan as visitas teatralizadas de Nadal ao Castelo de Soutomaior con todas as prazas esgotadas. Esta iniciativa permitirá á cidadanía achegarse á historia do castelo entre o mércores e o domingo 10 de decembro. Ademais desta actividade, este ano súmanse dúas novidades á programación de Nadal no castelo: un espectáculo de vídeo mapping e un xogo de escapismo.

O vídeo mapping consiste nun espectáculo gratuíto de luz e son proxectado na Torre da Homenaxe do castelo. Durará seis minutos e haberá pases continuos desde o atardecer ata as 21:00 horas. As persoas interesadas en observar o vídeo mapping poderán acceder entre o 22 de decembro e o 4 de xaneiro, exceptuando os días 24, 25 e 31 de decembro e o 1 de xaneiro que coinciden coas datas de peche.

No que respecta ao xogo de escapismo, aberto a maiores de 8 anos, trátase de vivir en primeira persoa o asedio ao Castelo de Soutomaior. Para iso os participantes terán que resolver, nun tempo máximo de 60 minutos, probas e pistas en grupos para axudar a Pedro Madruga a parar aos Irmandiños. A actividade contará con seis pases ao día desde as 11 ata as 14 horas e desde as 16 ata as 19 horas.