Sanidade fai un chamamento á cidadanía para a vacinación de gripe e Covid-19

O día 9 de decembro finaliza a vacinación da gripe e da covid nos grandes recintos, continuando a inmunización nos hospitais e centros de saúde

Vacunación dun menor // Imaxe: Diario Sur

Metanoia

A Consellería de Sanidade fai un chamamento á cidadanía para que se vacine da gripe e da Covid antes de que finalice o ano. Para ese efecto, a Dirección Xeral de Saúde Pública da Consellería de Sanidade informa que, o día 9 do presente mes, finaliza a vacinación da gripe e da covid nos grandes recintos. Deste xeito, desde o luns, 11 de decembro, o departamento sanitario galego continuará inmunizando á cidadanía galega nos hospitais e centros de saúde.

As persoas de 80 e máis anos, como ata o de agora, poden acudir previa cita ao seu centro de saúde de cabeceira para recibir a vacina de covid e gripe.

Se o prefiren poden acudir a vacinarse nos hospitais, como terán que facer o resto das persoas menores de 80 anos que teñen indicada a vacinación de covid e gripe. Para iso, deben coller autocita nos días e horas dispoñibles, que se poden consultar na seguinte dirección.

Gripe en nenos de 6 a 59 meses

Por outra banda, a fin de semana do 16 e o 17 deste mes ábrense os hospitais para a vacinación da gripe nos nenos e nenas de 6 a 59 meses. Trátase dun novo chamamento para facilitar a conciliación, e que se poida vacinar aos cativos na fin de semana, xa que é posible facelo calquera día da semana nos centros de saúde. A Dirección Xeral de Saúde Pública procederá a facer a convocatoria, de novo, por SMS.

Vixilancia pola gripe e a Covid

Nesta semana epidemiolóxica notificouse o ingreso de 91 persoas con gripe confirmada, un 40% máis que a semana previa, sendo a taxa máis elevada a observada no grupo de 65 e máis anos de idade, seguido do de 0 a 4 anos. No que vai de tempada notificáronse 257 ingresos, todos con virus do tipo A, e trece deles ingresaron na UCI.

Polo que alcanza á Covid, mantense o número de casos constante dos dous últimos meses. A data de hoxe, 9 persoas permanecen en UCI e 107 están en unidades de hospitalización.

Respecto do virus respiratorio sincitial, Sanidade informa que é o que presenta na actualidade o maior número de casos, atopándonos agora enriba da onda.